Министерот Крешник Бектеши најави дека при крајот на првиот квартал од годинава ќе биде објавен јавниот повик за ваучерите за домашен туризам од страна на Министерството за економија.
Тие ќе бидат наменети за семејства со приходи пониски од 30.000 денари.
„Ќе има различни критериуми од претходно издадените ваучери во време на пандемија.
Вредноста на секој ваучер ќе биде 250 евра за семејствата кои се најпогодени и имаат приходи помалку од 30.000 денари”, рече Бектеши.
Тој за време на посетата на компанијата „Раде Кончар ТЕП” изјави дека очекува овој месец да биде клучен за реализација на мерките од петтиот пакет економски мерки и ја повика опозицијата да гласа во Собранието за да се усвои гарантната шема.
Бектеши пред некој ден рече дека во петтиот пакет мерки има две опции или исплата на плати или бескаматни кредити со 12 месеци грејс период и 3 години рок на исплата преку МБПР.
Петтиот пакет економски мерки за поддршка на стопанството и граѓаните за справување со последиците од ковид-19 ќе тежи помеѓу 50 и 60 милиони евра како директни буџетски импликации, но како фискални импликации ќе биде околу 150 милиони евра и се очекува да биде финализиран неделава ако се постигне консензус со сите засегнати страни.
„Ќе има финансиска поддршка за платите исто како што беше и претходно затоа што и претходната помош не беше безусловна. И порано требаше да се исполнат одредени услови за помошта да стане неповратна, а истиот механизам го користиме и сега.
Се разговара за двете опции со синдикатите, стопанските комори и сите други – да се продолжи со поддршката како и досега или таа да се замени со бескаматни кредити. Оваа недела ќе треба заеднички да решиме со сите засегнати страни која е најдобрата мерка, имајќи предвид дека полека заздравуваме и влегуваме во рестарт на економијата“, рече Битиќи.
Тој додаде дека доделувањето на ваучери за граѓаните беше ад-хок мерка направена во период на криза и со неа беа опфатени речиси 700 илјади граѓани, но како што рече, во сетот на мерки кој сега се предвидува има мерка за отпис на каматите за заостанатите долгови кои ги имаат граѓаните кон јавните претпријатија на локално или на национално ниво што значи поголема директна помош за граѓаните. Во целиот пакет има повеќе од 20 мерки од кои ќе дојдат доволно средства до тие кои се најзагрозени.
„Доколку има потреба во наредните месеци ќе има нови мерки за граѓаните. Никој не е изоставен од мерките, бидејќи нас како Влада сите граѓани ни се битни и ќе бидат опфатени со различните мерки во различните пакети кои ги носиме.
Како Влада знаеме дека сѐ уште ќе се справуваме со ковид-19 и затоа креиравме програми во ресорните министерства во кои некои програми ги дополнивме со дополнителни финансиски средства за граѓаните“, рече Битиќи.
Евентуалното супституирање на мерката финансиска поддршка на плати со новата мерка за поддршка на плати преку кредитната линија на Развојната банка, појасни, ќе биде само супститут, а критериумите би требало да останат исти и помошта да ја добијат сите на кои им е потребна.
„Не размислуваме за критериуми преку кои на некои ќе им кажеме сега нема пари. Не е класична кредитна линија туку само го менуваме супститутот. Тоа е во духот на развој и рестарт на економијата, а дополнително ги мотивираме компаниите да покажат позитивни финансиски резултати за да добијат одредена сума на неповратни средства. Никој нема да биде изоставен.
Следиме дека се намалува бројот на компании и работни места за кои е потребна поддршка и имаат пад поголем од 30 отсто. Ако во април имаше 128 илјади вработени на кои им требаше финансиска поддршка од 14.500 денари во декември има околу 60 илјади вработени од околу 11 илјади фирми кои ја искористиле оваа поддршка и добиле просечно 15.800 денари“, вели Битиќи.
За финансиската помош од претходните пакети мерки до 31 декември, според последните проценки, од Буџетот се исплатени 350,4 милиони евра во кои не влегуваат финансиските средства кои се потрошени во јануари годинава и иако се доставени пред повеќе од 2,5 месеци во Собранието сѐ уште не се донесени трите законски решенија кои требаше да вбризгаат 250 милиони евра во стопанството.
Ќе видиме во следниот период што од ветеното од петтиот пакет Владата ќе оствари.
